গুৱাহাটী,২৭ ছেপ্টেম্বৰঃ মুখ্যমন্ত্রী  ড° হিমন্ত বিশ্ব শর্মাই অসম প্রশাসনীয় পদাধিকাৰী মহাবিদ্যালয়ত তাই আহােম সম্প্রদায়ৰ বিভিন্ন সংগঠনৰ প্রতিনিধিৰ সৈতে এক বৈঠকত মিলিত হয়। এই বৈঠকত সদৌ তাই আহােম ছাত্র সন্থা, তাই আহােম যুৱ পৰিষদ অসম, পূর্বাঞ্চল তাই সাহিত্য সভা, সদৌ অসম আহােম সভা, মহন দেওধাই বাইলুং সন্মিলনৰ প্রতিনিধিসকলে তেওঁলােকৰ সম্প্রদায়সমূহৰ বিভিন্ন বিষয় মুখ্যমন্ত্রীক অৱগত কৰে।

বৈঠকত মুখ্যমন্ত্রীয়ে কয় যে তাই ভাষাটো জনপ্রিয়কৰণ তথা বর্তাই ৰখাৰ বাবে ৰাজ্য চৰকাৰে তাই ভাষা শিক্ষণ কেন্দ্র এটা স্থাপন কৰিব। ৰাজ্যখনৰ ট্রাইবেল ব্লক আৰু বেল্টসমূহত আহােমসকলক সংৰক্ষিত শ্রেণীৰ মর্যাদা প্রদান কৰা হ’ব বুলি উল্লেখ কৰি মুখ্যমন্ত্রীয়ে কয় যে যােৰহাটত থকা চ্যুকাফা সমন্বয় ক্ষেত্রক পর্যটনৰ এক উল্লেখযােগ্য স্থান হিচাপে ৰূপান্তৰ কৰা হ’ব আৰু ইয়াৰ সকলাে কাম দুই বছৰৰ ভিতৰত সম্পূর্ণ কৰা হ’ব।

মুখ্যমন্ত্রীয়ে লগতে কয় যে শিৱসাগৰৰ জয়সাগৰত এটা তাই সংগ্রহালয় আৰু ৰংঘৰ চৌহদত জয়মতী সংগ্রহালয় স্থাপন কৰা হ’ব। মুখ্যমন্ত্রীয়ে লগতে কয় যে অসম দর্শন আঁচনিৰ অধীনত আহােমসকলৰ উপাসনাথলীসমূহ সংৰক্ষণ আৰু সংবদ্ধধন কৰাৰ লগতে জনতা ভৱনত চ্যুকাফাৰ এটা প্রতিমুর্তি স্থাপন কৰা হ’ব। মুখ্যমন্ত্রীয়ে লগতে কয় যে তাই আহােম উন্নয়ন পৰিষদলৈ প্রদান কৰিবলগীয়া ১২৫ কোটি টকা এই বর্ষৰ নৱেম্বৰৰ ৩০ তাৰিখৰ ভিতৰত মােকলাই দিয়া হ’ব। সম্প্রদায়টোৰ কমকৈ জ্ঞাত ঐতিহাসিক স্থান তথা সমলসমূহৰ সংৰক্ষণৰ বাবে এই পুঁজি ব্যৱহাৰ কৰাৰ বাবে মুখ্যমন্ত্রীয়ে আহ্বান জনায়।

স্বর্গদেউ চ্যুকাফা বিশ্ববিদ্যালয় স্থাপনৰ প্রস্তাৱটো চৰকাৰে ইতিবাচক দিশেৰে বিবেচনা কৰিব বুলিও মুখ্যমন্ত্রীয়ে প্ৰতিনিধিবর্গক কয়। তাইসকলৰ জনজাতিকৰণৰ বিষয়টো উল্লেখ কৰি মুখ্যমন্ত্রীয়ে তাই আহােম সম্প্রদায়ৰ সংগঠনসমহৰ লগত ট্রাইবেল সংঘৰ প্রতিনিধিবর্গৰ এক বৈঠক অনুষ্ঠিত কৰাৰ বাবে আহ্বান জনায় যাতে বিষয়সমূহৰ সমাধানসূত্র উলিয়াই আগবাঢ়িব পৰা যায়। মুখ্যমন্ত্রীয়ে লগতে কয় যে অসমৰ সকলাে খিলঞ্জীয়া সম্প্রদায়সমুহ একত্রিত হৈ থাকিব লাগিব যাতে প্রব্রজনকাৰীসকলৰ পৰা চ্যুকাফাৰ অসমক সুৰক্ষিত কৰিব পৰা যায়।

বৈঠকত ভৈয়াম জনজাতি আৰু অন্যান্য পিছপৰা শ্রেণী কল্যাণ বিভাগৰ মন্ত্রী ডাঃ ৰণােজ পেগু উপস্থিত আছিল। আনহাতে মুখ্যমন্ত্রী ড° শর্মাই ৰাজ্যখনৰ মটক সম্প্রদায়ৰ বিভিন্ন সংগঠনৰ প্রতিনিধিবর্গৰ সৈতেও আন এখন বৈঠকত মিলিত হয়। অসম প্রশাসনীয় পদাধিকাৰী মহাবিদ্যালয়ত অনুষ্ঠিত এই বৈঠকত মটক স্বায়ত্ত শাসতি পৰিষদ, সদৌ অসম মটক সম্মিলন, সদৌ অসম মটক যুৱ ছাত্র সন্মিলন, সদৌ অসম মটক মহিলা পৰিষদৰ প্রতিনিধিসকলে তেওঁলােকৰ সম্প্রদায়ৰ বিভিন্ন বিষয় মুখ্যমন্ত্রীক অৱগত কৰাৰ লগতে সম্প্রদায়টোৰ সর্বাংগীন কল্যাণৰ বিভিন্ন পৰিকল্পনাৰ বিষয়েও আলােচনা কৰে। বৈঠকত মুখ্যমন্ত্রীয়ে কয় যে মটক সম্প্রদায়ৰ লােকসকললৈ অন্যান্য পিছপৰা শ্রেণীৰ প্রমাণপত্র প্রদান কৰাৰ দিশত সদৌ অসম মটক সন্মিলনক সম্পূর্ণ কর্তৃত্ব প্রদান কৰা হ’ব। ৰাজ্যখনৰ বিভিন্ন শৈক্ষিক প্রতিষ্ঠানত মটক সম্প্রদায়ৰ আসন সংৰক্ষণ নির্দ্ধাৰণ কৰাৰ বাবে বিভিন্ন বিভাগৰ মন্ত্রীসকলক সামৰি এখন সমিতি গঠন কৰা হ’ব। সম্প্রদায়টোৰ ভূমি সম্বন্ধীয় বিষয়সমূহ আলােচনা কৰি মুখ্যমন্ত্রীয়ে কয় যে মিছন বসুন্ধৰাৰ অধীনত সময় সাপেক্ষ আৰু স্বচ্ছতাৰে এই বিষয়সমূহ নিষ্পত্তি কৰা হ’ব।

মুখ্যমন্ত্রীয়ে লগতে কয় যে ৰাজ্য চৰকাৰে মটক সম্প্রদায়লৈ জনজাতিৰ মর্যাদা প্রদানৰ অনুমােদন কেন্দ্রীয় চৰকাৰলৈ প্রেৰণৰ দিশত নীতিগতভাৱে সন্মতি প্রদান কৰিছে। মুখ্যমন্ত্রীয়ে লগতে কয় যে ৰাজ্য চৰকাৰে মটক উন্নয়ন পৰিষদৰ শক্তিশালীকৰণৰ বাবে পদক্ষেপ ল’ব। পৰিষদখনলৈ ২৫ কোটি টকা প্রদানৰ দায়বদ্ধতা ৩০ নৱেম্বৰৰ ভিতৰত পূৰণ কৰা হ’ব।

এই পুঁজি ব্যৱহাৰ তথা প্রস্তাৱসমূহৰ ওপৰত ভিত্তি কৰি আৰু অধিক পুঁজি আগবঢ়োৱা হ’ব বুলিও মুখ্যমন্ত্রীয়ে কয়। মুখ্যমন্ত্রীয়ে গুৱাহাটীত মটক ভৱন নির্মাণৰ বাবে ভূমি প্রদান, মায়ামৰা সত্রক বেদখলৰ পৰা মুক্তকৰণ, সম্প্রদায়টোৰ ঐতিহাসিক স্থান আৰু সমল সংৰক্ষণ, ডিব্রুগড় বিশ্ববিদ্যালয়ত অনিৰুদ্ধদেৱ আসন কার্যক্ষম কৰাৰ দিশত ৰাজ্য চৰকাৰে ক্ষিপ্রতাৰে পদক্ষেপ ল’ব বুলিও কয়। মটক সম্প্রদায়ৰ সংগঠনসমূহক সম্প্রদায়টোৰ মাজত শৈক্ষিক পৰিৱেশ সৃষ্টি তথা মটক সম্প্রদায়ৰ শিক্ষিত যুৱক-যুৱতীসকলক সম্প্রদায়টোৰ সামূহিক উন্নয়নৰ দিশত ঐকান্তিকতাৰে কাম কৰাব বাবেও আজিৰ বৈঠকতে মুখ্যমন্ত্রীয়ে আহ্বান জনায়। বৈঠকত মন্ত্রী ডাঃ ৰণােজ পেগু আৰু চাবুৱা সমষ্টিৰ বিধায়ক পােনাকণ বৰুৱা উপস্থিত আছিল।