অসম

সংস্থাপন দিয়াৰ প্ৰতিশ্ৰুতি পূৰণ নকৰি চলালে উচ্ছেদ অভিযান

গুৱাহাটী,২৮ ছেপ্তেম্বৰঃ মুখ্যমন্ত্রী হিমন্ত বিশ্ব শৰ্মাই ছিপাঝাৰৰ ধলপুৰৰ লোকসকলক সংস্থাপিত কৰাৰ প্ৰতিশ্ৰুতি দিছিল। প্ৰতিটো পৰিয়ালক ছয় বিঘাকৈ ভূমি দিয়াৰ আশ্বাস প্ৰদান কৰিছিল। কিন্তু সেই প্ৰতিশ্ৰুতি আৰু আশ্বাস পূৰণ নকৰি উচ্ছেদ কাৰ্য চলোৱাৰ উপৰি নিৰীহ লোকসকলৰ ওপৰত গুলীচালনা কৰিলে। এই অভিযোগ প্ৰদেশ কংগ্ৰেছ বিধায়িনী দলৰ।

মঙলবাৰে বিধানসভাৰ কংগ্ৰেছ বিধায়িনী দলৰ কক্ষত আয়োজন কৰা এখন সংবাদমেলত ধলপুৰৰ ঘটনাকলৈ মুখ্যমন্ত্রীয়ে কৰা মন্তব্যৰ তীব্ৰ প্ৰতিক্ৰিয়া প্ৰকাশ কৰে বিধায়িনী দলৰ মুখ্য সচেতক ৱাজেদ আলী চৌধুৰীয়ে।

সংবাদমেলত তেওঁ কয়-‘ মুখ্যমন্ত্রী হিমন্ত বিশ্ব শৰ্মাৰ সৈতে ২১ আগষ্টত প্ৰদেশ কংগ্ৰেছ বিধায়িনী দলৰ হোৱা আলোচনাত ধলপুৰৰ প্ৰতিটো পৰিয়ালক ৬ বিঘাকৈ ভূমি দিয়াৰ কথা হৈছিল। মুখ্যমন্ত্রীয়ে লোকসকলক উচ্ছেদ কৰি ৰাস্তালৈ পঠিওৱা নহয় বুলি ‍আশ্বাস প্ৰদান কৰিছিল। আমি সংস্থাপন নিদিয়াকৈ উচ্ছেদ নকৰাৰ বাবে আহ্বান জনাই স্মাৰক পত্র প্ৰদান কৰিছিলো।

ধলপুৰৰ সেই লোকসকল গৰাখহনীয়াত ঘৰ-বাৰী হেৰুৱাই তাত আশ্ৰয় লৈছিল। প্ৰায় ৪০ বছৰ ধৰি ধলপুৰৰ সেই চৰত তেওঁলোকে বসবাস কৰি আহিছিল। মুখ্যমন্ত্রীয়ে দিয়া আশ্বাস আৰু প্ৰতিশ্ৰুতিত আমি আশ্বস্ত হৈছিলো। কিন্তু এমাহ পাছতেই কোনো ধৰণৰ সংস্থাপনৰ ব্যৱস্থা নকৰি লোকসকলক অমানৱিয়ভাৱে উচ্ছেদ কৰা হ’ল। গুলীয়াই হত্যা কৰা হ’ল। এই ঘটনাৰ পাছত এতিয়া মুখ্যমন্ত্রীয়ে আমাৰ লগত আলোচনা হোৱাৰ কথা বাৰম্বাৰ উল্লেখ কৰিছে। কিন্তু আমাৰ লগত হোৱা আলোচনাৰ কোনো কথাই বাস্তৱত কাৰ্যকৰী কৰা নহ’ল।’ তেওঁ লগতে কয়-‘ মুখ্যমন্ত্রীয়ে কথা মতে কাম নকৰিলে। কেৱল ধলপুৰৰ চৰৰ ভূমিতেই নহয় ৰাজ্যৰ বিভিন্ন প্ৰান্তৰ চৰৰ ভূমিত বেদখল হৈছে।

চৰকাৰখনে এটা নিৰ্দ্দিষ্ট সম্প্ৰদায়ক টাৰ্গেট কৰি লৈছে। উচ্ছেদ কৰা সেই অঞ্চলত থকা লোকসকল এশ শতাংশ মুছলমান। তাত কোনো হিন্দু লোক নাই আৰু মন্দিৰো নাই। তেওঁলোকো কৃষক। যদি কৃষি কাৰ্য কৰিব লাগে তেন্তে তেওঁলোককো কৃষিকাৰ্যত জড়িত কৰিব পাৰিলে হয়। কিন্তু তাকে নকৰি উচ্ছেদ অভিযান চলালে।’ সংবাদমেলত কংগ্ৰেছৰ কেইবাজনো বিধায়ক উপস্থিত আছিল।

Up Next

চি পি আই মাওইষ্টৰ নেতা টিংৰাজ ওৰাঙৰ আত্মসমৰ্পন

Don't Miss

মাজুলীৰ বিধায়ক পদ ত্যাগ কেন্দ্ৰীয় মন্ত্রী সৰ্বানন্দ সোণোৱালৰ

Click to comment

অসম

নিলম্বিত ডি আই জি ৰৌণক আলী হাজৰিকাৰ বিৰুদ্ধে চাৰ্জশ্বিট দাখিল

গুৱাহাটী,২ ডিচেম্বৰঃ নিলম্বিত ডি আই জি ৰৌনক আলী হাজৰিকাৰ বিৰুদ্ধে মুখ্যমন্ত্রীৰ তদাৰকী কোষে দাখিল কৰিলে চাৰ্জশ্বিট। আয়তকৈ অধিক সম্পত্তিৰ অভিযোগত গ্ৰেপ্তাৰ হোৱা অসম আৰক্ষীৰ নিলম্বিত উপ-মহাপৰিদৰ্শক ৰৌণক আলী হাজৰিকাৰ বিৰুদ্ধে থকা গোচৰৰ আজি চাৰ্জশ্বিট দাখিল কৰিলে মুখ্যমন্ত্ৰীৰ বিশেষ তদাৰকী কোষে।

৫৭ দিনৰ ভিতৰত তদন্তকাৰী বিষয়াই আদালতত ১৫৬ পৃষ্ঠাজোৰা অভিযোগনামা দাখিল কৰে। জানিব পৰা মতে অভিযোগনামাত ৰৌণক আলিৰ পত্নী নুছৰত ৰৌণক হাজৰিকাৰ নামো আছে। তদুপৰি কন্যালৈ বিভিন্ন একাউন্টেৰে ধনৰ লেনদেন কৰা ফৰিদ আলিৰ লগতে মাটি-বাৰীৰ বিষয়েও সন্নিবিষ্ট আছে অভিযোগনামাত। চাৰ্জশ্বিটত উল্লেখ থকা অনুসৰি ৰৌণক আলী হাজৰিকাৰ মুঠ সম্পত্তিৰ আয় বৰ্হিভূত সম্পত্তিৰ পৰিমাণ প্ৰায় ২১০ শতাংশ। মুঠ সম্পত্তিৰ মুল্য ৪ কোটি ৯৯ হাজাৰ ৫৯৭ টকা।

উল্লেখ্য যে বিভাগীয় কোনো অনুমতি নোলোৱাকৈয়ে ২০১১ চনৰ পৰা কেইবাবাৰো বিদেশ ভ্ৰমণ কৰাৰ বাবে জুলাই মাহত ৰাজ্য চৰকাৰে ৰৌণক আলী হাজৰিকাক নিলম্বন কৰাৰ পিছত ৫ অক্টোবৰত তেওঁক মুখ্যমন্ত্রীৰ বিশেষ তদাৰকী কোষে গ্ৰেপ্তাৰ কৰিছিল।

অসম

জলসম্পদ বিভাগৰ সকলো কাম ডিচেম্বৰৰ ভিতৰত আৰম্ভ কৰাৰ নিৰ্দেশ

গুৱাহাটী,২ ডিচেম্বৰ: জলসম্পদ মন্ত্ৰী পীযুষ হাজৰিকাই আজি বিভাগৰ বিষয়া আৰু অভিযন্তাসকলৰ সৈতে এখন বৈঠকত অংশ লৈ বিভাগটোৰ কাম-কাজৰ পৰ্যালোচনা কৰে। জনতা ভৱনৰ নিজা কাৰ্যালয়ৰ সভাকক্ষত অনুষ্ঠিত পৰ্যালোচনা বৈঠকত মন্ত্ৰীগৰাকীয়ে চলিত বৰ্ষত বিভাগে কৰিবলগীয়া বিভিন্ন কামৰ খতিয়ান লয় আৰু সকলোকে নিজৰ কামবোৰ সুচাৰুৰূপে কৰাৰ বাবে নিৰ্দেশ দিয়ে।

বৈঠকতে মন্ত্ৰীগৰাকীয়ে জলসম্পদ বিভাগৰ আঁচনিবোৰৰ বাবে প্ৰয়োজনীয় সকলো বিভাগীয় অনুমতিৰ কাম ক্ষীপ্ৰতাৰে কৰাৰ বাবে সংশ্লিষ্ট সকলোকে নিৰ্দেশ দিয়ে। এই ক্ষেত্ৰত সংশ্লিষ্ট জিলাসমূহৰ উপায়ুক্তসকলৰ সৈতেও টেলিফোনিক বাৰ্তালাপ কৰি তেওঁলোকক প্ৰয়োজনীয় সহযোগিতা আগবঢ়াবলৈ আহ্বান জনায়। বিভাগটোক অধিক ৰূপত গতিশীল কৰি ডিচেম্বৰ মাহৰ ভিতৰতে চলিত বৰ্ষৰ সকলো কাম আৰম্ভ কৰাৰ বাবেও মন্ত্ৰীগৰাকীয়ে বিষয়া আৰু অভিযন্তাসকলক নিৰ্দেশ দিয়ে।

আনহাতে বানমুক্ত অসমৰ বাবে মুখ্যমন্ত্ৰী ড০ হিমন্ত বিশ্ব শৰ্মাই জলসম্পদ বিভাগক ভালদৰে কাম কৰিবলৈ নিৰ্দেশ দিয়া বুলি উল্লেখ কৰি মন্ত্ৰী পীযুষ হাজৰীকাই কয় যে বান নিয়ন্ত্ৰণ কৰিবলৈ মুখ্যমন্ত্ৰীয়ে বিভাগটোক প্ৰয়োজনীয় সকলো সহযোগিতা আগবঢ়াই আহিছে। আনহাতে চৰকাৰী পুঁজিৰ সদব্যৱহাৰ কৰি নিয়াৰিকৈ কামবোৰ আগবঢ়াই নিবলৈ সকলোকে নিৰ্দেশ দি মন্ত্ৰীগৰাকীয়ে কামৰ ক্ষেত্ৰত কোনোধৰণৰ আপোচ কৰা নহ’ব বুলিও উল্লেখ কৰে। বৈঠকত বিভাগীয় শীৰ্ষ বিষয়াসকল উপস্থিত আছিল।

অসম

চান্দা সংস্কৃতিৰ বিৰুদ্ধে চৰকাৰে গ্ৰহণ কৰা পদক্ষেপক আদৰণি ‘এৰিডা’ৰ

গুৱাহাটী,২ ডিচেম্বৰঃ বলপূৰ্বকভাৱে ‘চান্দা’ সংগ্ৰহ কৰা তথা ধন দাবী কৰাৰ বিৰুদ্ধে শেহতীয়াকৈ কঠোৰ হৈছে ৰাজ্য চৰকাৰ। অসমত সংগঠনৰ অভাৱ নাই আৰু ইয়াৰে অধিকাংশই চান্দা সংগ্ৰহক এটা সংস্কৃতিত পৰিণত কৰিছে। যাৰ বাবে এইক্ষেত্রত কঠোৰ হৈছে ৰাজ্য চৰকাৰ। চান্দা সংস্কৃতিৰ বিৰুদ্ধে ৰাজ্য চৰকাৰে গ্ৰহণ কৰা পদক্ষেপক আদৰণি জনাইছে অসম ৰিয়েল ষ্টেট ইনফ্ৰাষ্টাকচাৰ ডেভলপাৰ্চ এছচিয়েচন চমুকৈ ‘এৰিডা’ই। এই সন্দৰ্ভত ‘এৰিডা’ৰ সভাপতি পি কে শৰ্মাই কয়-‘ বছৰৰ পাছত বছৰ ধৰি চলি অহা বেআইনী চান্দা সংস্কৃতিৰ বিৰুদ্ধে মুখ্যমন্ত্রী হিমন্ত বিশ্ব শৰ্মা নেতৃত্বাধীন চৰকাৰখনে গ্ৰহণ কৰা পদক্ষেপক আমি স্বাগতম জনাইছো।

চান্দাৰ নামত বলপূৰ্বকভাৱে ধন সংগ্ৰহ কৰাটো একাংশ সংগঠনৰ বাবে ব্যৱসায়ত পৰিণত হৈছে।’ শৰ্মাই লগতে কয়-‘ এই চান্দা সংস্কৃতিয়ে অসমৰ ব্যৱসায়-বাণিজ্যৰ ক্ষেত্রখনত প্ৰভাৱ পেলাই আহিছে। ইয়াৰ বাবে ৰাজ্যখনত ব্যৱসায় কৰাটো বহুতৰে বাবে যথেষ্ট কষ্টকৰ হোৱাৰ উপৰি বিনিয়োগৰ ক্ষেত্রতো প্ৰভাৱ পৰিছিল। বিভিন্ন সংগঠনৰ চান্দাৰ হাৰাশান্তিৰ বাবেই বহুতে বিনিয়োগ কৰাৰ বাবে আগ্ৰহী হোৱা নাছিল।’ বিভিন্ন স‍মগ্ৰীৰ মূল্যবৃদ্ধিৰ আঁৰত চান্দা সংস্কৃতিৰ প্ৰভাৱ থকাৰ প্ৰসংগ উল্লেখ কৰি শৰ্মাই কয়-‘ চান্দাৰ অভাৱনীয় বোজা ব্যৱসায়ীয়ে মূল্যবৃদ্ধিৰ জৰিয়তে সাধাৰণ জনতাৰ ওপৰত জাপি দিবলৈ বাধ্য হয়।

ব্যৱসায়-বাণিজ্যৰ বিস্ত‍াৰ তথা বিনিয়োগৰ জৰিয়তে ৰাজ্যৰ সৰ্বাংগীন বিকাশৰ বাবে এনে চান্দা সংস্কৃতি বন্ধ কৰাটো নিত্যান্তই প্ৰয়োজন।’ চৰকাৰৰ পদক্ষেপক আদৰণি জনাই শৰ্মাই ৰাজ্যজুৰি চান্দবাজিৰ বিৰুদ্ধে অভিযোগ দিয়াৰ বাবে হেল্পলাইন নম্বৰ মুকলি কৰাৰ বাবে চৰকাৰৰ প্ৰতি আহ্বান জনায়।