অসম

মুখ্যমন্ত্রীয়ে এটাৰ পাছত আনটোকৈ বাৰম্বাৰ আইন উলংঘা কৰি গৈছে

গুৱাহাটী,২৭ অক্টোবৰঃ মুখ্যমন্ত্রী হিমন্ত বিশ্ব শৰ্মাই নিৰ্বাচন আয়োগক ন’হলে সমষ্টিবাসী ৰাইজক ঠগালে। কাৰোবাক নহয় কাৰোবাক মুখ্যমন্ত্রীগৰাকীয়ে মিছা কথা ক’লে। এই অভিযোগ সাংসদ গৌৰৱ গগৈৰ। বুধবাৰে গুৱাহাটীৰ ৰাজীৱ ভৱনত এখন সংবাদমেল সম্বোধন কৰি সাংসদ গৌৰৱ গগৈয়ে মুখ্যমন্ত্রী হিমন্ত বিশ্ব শৰ্মাক কঠোৰ ভাষাৰে সমালোচনা কৰে। তেওঁ কয় যে কংগ্ৰেছৰ অভিযোগৰ ভিত্তিত নিৰ্বাচন আয়োগে মুখ্যমন্ত্রীক কাৰণ দৰ্শোৱাৰ জাননী জাৰি কৰি মঙলবাৰে বিয়লি ৫ বজাৰ ভিতৰত উত্তৰ দিব কৈছিল।

মুখ্যমন্ত্রীগৰাকীয়ে উত্তৰ দিলে যদিও উত্তৰত নিৰ্বাচন আয়োগ সন্তুষ্ট নহ’ল। যাৰবাবে আয়োগে মুখ্যমন্ত্রীগৰাকীক কঠোৰ সকিয়নী দিলে। সাংসদ গগৈয়ে কয় যে মুখ্যমন্ত্রীয়ে বাজেটত ঘোষণা কৰা সিদ্ধান্তসমূহ নিৰ্বাচনী সভাত কৈছিল আৰু নতুন কোনো ঘোষণা কৰা নাই বুলি আয়োগক দিয়া উত্তৰত কৈছে। তাৰ মানে মুখ্যমন্ত্রীয়ে সমষ্টিবাসী ৰাইজক ঠগ-প্ৰৱঞ্চনা কৰিলে বুলি সাংসদ গগৈয়ে প্ৰশ্ন উত্থাপন কৰে। মুখ্যমন্ত্রীগৰাকীয়ে এটাৰ পাছত আনটোকৈ বাৰম্বাৰ আইন উলংঘা কৰি গৈছে বুলি অভিযোগ কৰি সাংসদ গগৈয়ে কয়-‘ মুখ্যমন্ত্রীয়ে নিৰ্বাচন আয়োগৰ ওচৰত নহয় অসমবাসীৰ ওচৰত ক্ষমা খুজিব লাগে। তেওঁ কথাই কথাই গৰুৰ প্ৰসংগ উত্থাপন কৰে। ৰাজনীতিক তেওঁ গৰুৰ বজাৰ কৰি পেলাইছে। তেওঁ নিজৰ স্বাৰ্থসিদ্ধিৰ বাবে কাম কৰি গৈছে।’

হিমন্ত বিশ্ব শৰ্মা নেতৃত্বাধীন চৰকাৰখনৰ দিনত ৰাজ্যখনত নিৰাশা আৰু হতাশাজনক পৰিস্থিতিয়ে বিৰাজ কৰিছে। যাৰ পৰিপ্ৰেক্ষিতত বিভিন্ন ক্ষেত্রত অপৰাধ বৃদ্ধি পাইছে বুলি সাংসদগৰাকীয়ে অভিযোগ কৰে। বৰ্ত্তমানৰ এই দুৰ্ভাগ্যজনক পৰিৱেশৰ বাবে চৰকাৰখনেই জগৰীয়া। এনে অশান্তিকৰ পৰিৱেশ পাঁচ বছৰ অব্যাহত থাকিলে কোনো এখন চৰকাৰেই পৰিস্থিতি নিয়ন্ত্রণ কৰিব নোৱাৰিব। ৰাইজৰ কথা চিন্তা নকৰি ৰাজনীতিক নিজৰ সম্পদ গঢ়াৰ আহিলা হিচাপে ব্যৱহাৰ কৰিছে চৰকাৰৰ নেতৃত্ব লোৱাসকলে। এইখন চৰকাৰ কিনা-বেচাৰ ৰাজনীতিত পাকৈত বুলি সাংসদ গগৈয়ে অভিযোগ কৰে।

উপনিৰ্বাচন সন্দৰ্ভত সাংসদগৰাকীয়ে কয়-‘ ৰাইজে চৰকাৰখনৰ বিৰুদ্ধে ভোট দিব। কংগ্ৰেছত সুবিধা আদায় কৰা সকল এতিয়া বিজেপিত একগোট হৈ সুবিধা আদায়ত লাগি আছে। উপনিৰ্বাচনত এইবাৰ ৰাইজে বিজেপিক শিক্ষা দিব।’ ৰাইজৰ দলৰ প্ৰসংগত সাংসদ গগৈয়ে কয় যে ৰাইজৰ দলে কোন শত্ৰু তথা কোন মিত্র তাকে এতিয়াও উপলব্ধি কৰি পৰা নাই। দলটোৱে নিজে নিজকে ধ্বংস কৰিব। বি পি এফ আৰু এ আই ইউ ডি এফ দলক ৰাইজে বিৰোধী দল হিচাপে কেতিয়াও গ্ৰহণ নকৰে বুলি সাংসদ গগৈয়ে কয়।

Up Next

খেলৰত্ন পুৰস্কাৰৰ বাবে মনোনীত লাভলীনা বৰগোঁহাইৰ নাম

Don't Miss

পৰ্যটকৰ বাবে মুকলি হ’ল লাওখোৱা অভয়াৰণ্য

Click to comment

অসম

নিলম্বিত ডি আই জি ৰৌণক আলী হাজৰিকাৰ বিৰুদ্ধে চাৰ্জশ্বিট দাখিল

গুৱাহাটী,২ ডিচেম্বৰঃ নিলম্বিত ডি আই জি ৰৌনক আলী হাজৰিকাৰ বিৰুদ্ধে মুখ্যমন্ত্রীৰ তদাৰকী কোষে দাখিল কৰিলে চাৰ্জশ্বিট। আয়তকৈ অধিক সম্পত্তিৰ অভিযোগত গ্ৰেপ্তাৰ হোৱা অসম আৰক্ষীৰ নিলম্বিত উপ-মহাপৰিদৰ্শক ৰৌণক আলী হাজৰিকাৰ বিৰুদ্ধে থকা গোচৰৰ আজি চাৰ্জশ্বিট দাখিল কৰিলে মুখ্যমন্ত্ৰীৰ বিশেষ তদাৰকী কোষে।

৫৭ দিনৰ ভিতৰত তদন্তকাৰী বিষয়াই আদালতত ১৫৬ পৃষ্ঠাজোৰা অভিযোগনামা দাখিল কৰে। জানিব পৰা মতে অভিযোগনামাত ৰৌণক আলিৰ পত্নী নুছৰত ৰৌণক হাজৰিকাৰ নামো আছে। তদুপৰি কন্যালৈ বিভিন্ন একাউন্টেৰে ধনৰ লেনদেন কৰা ফৰিদ আলিৰ লগতে মাটি-বাৰীৰ বিষয়েও সন্নিবিষ্ট আছে অভিযোগনামাত। চাৰ্জশ্বিটত উল্লেখ থকা অনুসৰি ৰৌণক আলী হাজৰিকাৰ মুঠ সম্পত্তিৰ আয় বৰ্হিভূত সম্পত্তিৰ পৰিমাণ প্ৰায় ২১০ শতাংশ। মুঠ সম্পত্তিৰ মুল্য ৪ কোটি ৯৯ হাজাৰ ৫৯৭ টকা।

উল্লেখ্য যে বিভাগীয় কোনো অনুমতি নোলোৱাকৈয়ে ২০১১ চনৰ পৰা কেইবাবাৰো বিদেশ ভ্ৰমণ কৰাৰ বাবে জুলাই মাহত ৰাজ্য চৰকাৰে ৰৌণক আলী হাজৰিকাক নিলম্বন কৰাৰ পিছত ৫ অক্টোবৰত তেওঁক মুখ্যমন্ত্রীৰ বিশেষ তদাৰকী কোষে গ্ৰেপ্তাৰ কৰিছিল।

অসম

জলসম্পদ বিভাগৰ সকলো কাম ডিচেম্বৰৰ ভিতৰত আৰম্ভ কৰাৰ নিৰ্দেশ

গুৱাহাটী,২ ডিচেম্বৰ: জলসম্পদ মন্ত্ৰী পীযুষ হাজৰিকাই আজি বিভাগৰ বিষয়া আৰু অভিযন্তাসকলৰ সৈতে এখন বৈঠকত অংশ লৈ বিভাগটোৰ কাম-কাজৰ পৰ্যালোচনা কৰে। জনতা ভৱনৰ নিজা কাৰ্যালয়ৰ সভাকক্ষত অনুষ্ঠিত পৰ্যালোচনা বৈঠকত মন্ত্ৰীগৰাকীয়ে চলিত বৰ্ষত বিভাগে কৰিবলগীয়া বিভিন্ন কামৰ খতিয়ান লয় আৰু সকলোকে নিজৰ কামবোৰ সুচাৰুৰূপে কৰাৰ বাবে নিৰ্দেশ দিয়ে।

বৈঠকতে মন্ত্ৰীগৰাকীয়ে জলসম্পদ বিভাগৰ আঁচনিবোৰৰ বাবে প্ৰয়োজনীয় সকলো বিভাগীয় অনুমতিৰ কাম ক্ষীপ্ৰতাৰে কৰাৰ বাবে সংশ্লিষ্ট সকলোকে নিৰ্দেশ দিয়ে। এই ক্ষেত্ৰত সংশ্লিষ্ট জিলাসমূহৰ উপায়ুক্তসকলৰ সৈতেও টেলিফোনিক বাৰ্তালাপ কৰি তেওঁলোকক প্ৰয়োজনীয় সহযোগিতা আগবঢ়াবলৈ আহ্বান জনায়। বিভাগটোক অধিক ৰূপত গতিশীল কৰি ডিচেম্বৰ মাহৰ ভিতৰতে চলিত বৰ্ষৰ সকলো কাম আৰম্ভ কৰাৰ বাবেও মন্ত্ৰীগৰাকীয়ে বিষয়া আৰু অভিযন্তাসকলক নিৰ্দেশ দিয়ে।

আনহাতে বানমুক্ত অসমৰ বাবে মুখ্যমন্ত্ৰী ড০ হিমন্ত বিশ্ব শৰ্মাই জলসম্পদ বিভাগক ভালদৰে কাম কৰিবলৈ নিৰ্দেশ দিয়া বুলি উল্লেখ কৰি মন্ত্ৰী পীযুষ হাজৰীকাই কয় যে বান নিয়ন্ত্ৰণ কৰিবলৈ মুখ্যমন্ত্ৰীয়ে বিভাগটোক প্ৰয়োজনীয় সকলো সহযোগিতা আগবঢ়াই আহিছে। আনহাতে চৰকাৰী পুঁজিৰ সদব্যৱহাৰ কৰি নিয়াৰিকৈ কামবোৰ আগবঢ়াই নিবলৈ সকলোকে নিৰ্দেশ দি মন্ত্ৰীগৰাকীয়ে কামৰ ক্ষেত্ৰত কোনোধৰণৰ আপোচ কৰা নহ’ব বুলিও উল্লেখ কৰে। বৈঠকত বিভাগীয় শীৰ্ষ বিষয়াসকল উপস্থিত আছিল।

অসম

চান্দা সংস্কৃতিৰ বিৰুদ্ধে চৰকাৰে গ্ৰহণ কৰা পদক্ষেপক আদৰণি ‘এৰিডা’ৰ

গুৱাহাটী,২ ডিচেম্বৰঃ বলপূৰ্বকভাৱে ‘চান্দা’ সংগ্ৰহ কৰা তথা ধন দাবী কৰাৰ বিৰুদ্ধে শেহতীয়াকৈ কঠোৰ হৈছে ৰাজ্য চৰকাৰ। অসমত সংগঠনৰ অভাৱ নাই আৰু ইয়াৰে অধিকাংশই চান্দা সংগ্ৰহক এটা সংস্কৃতিত পৰিণত কৰিছে। যাৰ বাবে এইক্ষেত্রত কঠোৰ হৈছে ৰাজ্য চৰকাৰ। চান্দা সংস্কৃতিৰ বিৰুদ্ধে ৰাজ্য চৰকাৰে গ্ৰহণ কৰা পদক্ষেপক আদৰণি জনাইছে অসম ৰিয়েল ষ্টেট ইনফ্ৰাষ্টাকচাৰ ডেভলপাৰ্চ এছচিয়েচন চমুকৈ ‘এৰিডা’ই। এই সন্দৰ্ভত ‘এৰিডা’ৰ সভাপতি পি কে শৰ্মাই কয়-‘ বছৰৰ পাছত বছৰ ধৰি চলি অহা বেআইনী চান্দা সংস্কৃতিৰ বিৰুদ্ধে মুখ্যমন্ত্রী হিমন্ত বিশ্ব শৰ্মা নেতৃত্বাধীন চৰকাৰখনে গ্ৰহণ কৰা পদক্ষেপক আমি স্বাগতম জনাইছো।

চান্দাৰ নামত বলপূৰ্বকভাৱে ধন সংগ্ৰহ কৰাটো একাংশ সংগঠনৰ বাবে ব্যৱসায়ত পৰিণত হৈছে।’ শৰ্মাই লগতে কয়-‘ এই চান্দা সংস্কৃতিয়ে অসমৰ ব্যৱসায়-বাণিজ্যৰ ক্ষেত্রখনত প্ৰভাৱ পেলাই আহিছে। ইয়াৰ বাবে ৰাজ্যখনত ব্যৱসায় কৰাটো বহুতৰে বাবে যথেষ্ট কষ্টকৰ হোৱাৰ উপৰি বিনিয়োগৰ ক্ষেত্রতো প্ৰভাৱ পৰিছিল। বিভিন্ন সংগঠনৰ চান্দাৰ হাৰাশান্তিৰ বাবেই বহুতে বিনিয়োগ কৰাৰ বাবে আগ্ৰহী হোৱা নাছিল।’ বিভিন্ন স‍মগ্ৰীৰ মূল্যবৃদ্ধিৰ আঁৰত চান্দা সংস্কৃতিৰ প্ৰভাৱ থকাৰ প্ৰসংগ উল্লেখ কৰি শৰ্মাই কয়-‘ চান্দাৰ অভাৱনীয় বোজা ব্যৱসায়ীয়ে মূল্যবৃদ্ধিৰ জৰিয়তে সাধাৰণ জনতাৰ ওপৰত জাপি দিবলৈ বাধ্য হয়।

ব্যৱসায়-বাণিজ্যৰ বিস্ত‍াৰ তথা বিনিয়োগৰ জৰিয়তে ৰাজ্যৰ সৰ্বাংগীন বিকাশৰ বাবে এনে চান্দা সংস্কৃতি বন্ধ কৰাটো নিত্যান্তই প্ৰয়োজন।’ চৰকাৰৰ পদক্ষেপক আদৰণি জনাই শৰ্মাই ৰাজ্যজুৰি চান্দবাজিৰ বিৰুদ্ধে অভিযোগ দিয়াৰ বাবে হেল্পলাইন নম্বৰ মুকলি কৰাৰ বাবে চৰকাৰৰ প্ৰতি আহ্বান জনায়।