ভাৰত

পুনৰ জনপ্ৰিয়তাৰ শীৰ্ষত প্ৰধানমন্ত্রী নৰেন্দ্ৰ মোডী

গুৱাহাটী,৭ নবেম্বৰঃ প্ৰধানমন্ত্ৰী নৰেন্দ্ৰ মোডীয়ে আকৌ এবাৰ বিশ্বৰ জনপ্ৰিয় নেতাৰ তালিকাত শীৰ্ষস্থান অধিকাৰ কৰিছে। আমেৰিকা যুক্তৰাষ্ট্ৰৰ তথ্য চোৰাংচোৱা প্ৰতিষ্ঠান দ্যা মৰ্ণিং কনচাণ্টৰ এক সমীক্ষাত এই তথ্য প্ৰকাশ পাইছে। কিন্তু বিভিন্ন কাৰনত দেশত ক্ৰমান্বয়ে মোডীৰ জনপ্ৰিয়তা হ্ৰাস পাই আহিছে। ইয়াৰ প্ৰমাণ শেহতীয়াকৈ অনুষ্ঠিত হৈ যোৱা দেশৰ বহু কেইখন ৰাজ্যৰ উপ-নিৰ্বাচন। উপ-নিৰ্বাচনত অসমক বাদ দি আন কোনো ৰাজ্যতে ভাল ফল দেখুৱাবলৈ সক্ষম নহ’ল বিজেপি। যাৰবাবে দেওবাৰে তাৎক্ষণিকভাৱে মোডীৰ দ্বিতীয় কাৰ্যকালত প্ৰথমখন কাৰ্যনিৰ্বাহক বৈঠক অনুষ্ঠিত কৰিবলৈ বাধ্য হৈছে। কাৰণ সন্মুখত আছে ৫ ৰাজ্যৰ বিধানসভাৰ নিৰ্বাচন।

এনে এক সময়তে আমেৰিকা যুক্তৰাষ্ট্ৰৰ চোৰোংচোৱা প্ৰতিষ্ঠান দ্যা মৰ্ণিং কনচাল্টৰে মোডীক বিশ্বৰ জনপ্ৰিয় নেতাৰ তালিকাত শীৰ্ষস্থান দিয়া বিষয়টো মন কৰিবলগীয়া। আমেৰিকাৰ প্ৰতিষ্ঠানটোৱে প্ৰকাশ কৰা এই তালিকাত প্ৰধানমন্ত্ৰী নৰেন্দ্ৰ মোডীৰ ৰেটিং আমেৰিকা যুক্তৰাষ্ট্ৰৰ ৰাষ্ট্ৰপতি জ’ বাইডেন আৰু বৃটিছ প্ৰধানমন্ত্ৰী বৰিছ জনছনকে ধৰি বিশ্বৰ ১৩ জন ৰাষ্ট্ৰপ্ৰধানৰ ওপৰত। তেওঁৰ অনুমোদনৰ ৰেটিং হৈছে ৭০ শতাংশ। ৫ নৱেম্বৰত সংস্থাটোৱে আপডেত কৰা এই সমীক্ষাত ভাৰতীয় প্ৰধানমন্ত্ৰী আন আন ৰাষ্ট্ৰনেতাতকৈ যথেষ্ট আগবাঢ়ি থকা দেখা গৈছে। মোডীয়ে জনপ্ৰিয়তাৰ গ্ৰাফত মেক্সিকান ৰাষ্ট্ৰপতি আন্দ্ৰে মানুৱেল লোপেজ অব্ৰাডৰ, ইটালীৰ প্ৰধানমন্ত্ৰী মাৰিঅ দ্ৰাঘি, জাৰ্মান চাঞ্চেলৰ এঞ্জেলা মাৰ্কেল, আমেৰিকা যুক্তৰাষ্ট্ৰৰ ৰাষ্ট্ৰপতি জো বাইডেনকে ধৰি কেইবাজনো শীৰ্ষ নেতাক অতিক্ৰম কৰিছে। দ্যা মৰ্ণিং কনচাল্টৰ জৰীপ অনুসৰি ভাৰতত দ্বিতীয় কৰ’না ঢৌৰ সময়ত মে’ মাহত প্ৰধানমন্ত্ৰী মোডীৰ জনপ্ৰিয়তা হ্ৰাস হৈছিল। সেই সময়ত তেওঁৰ ৰেটিং হ্ৰাস পাইছিল। সেই সময়ত কৰ’নাৰ বাবে চিকিৎসালয়সমূহত অক্সিজেনৰ অভাৱে দেখা দিছিল আৰু অক্সিজেনৰ অভাৱৰ বাবে বহুলোকে মৃত্যুবৰণ কৰিবলগীয়া হৈছিল।

সংস্থাটোৰ এই সমীক্ষাত আমেৰিকা যুক্তৰাষ্ট্ৰৰ ৰাষ্ট্ৰপতি পূৰ্বৰ ৫ স্থানৰ পৰা ৬ ষষ্ঠস্থানলৈ অৱনমিত হৈছে। একেদৰে ব্ৰিটিছ প্ৰধানমন্ত্ৰী অষ্টমস্থানৰ পৰা দশম স্থানলৈ অৱনমিত হৈছে। উল্লেখ্য যে মাৰ্কিন প্ৰতিষ্ঠানটোৱে এই সমীক্ষা অনলাইন মাধ্যমেৰে চলাইছিল। তেওঁলোকে ভাৰতৰ ২১২৬ জন লোকৰ অনলাইন সাক্ষাৎকাৰ গ্ৰহণ কৰিছিল। সেই সাক্ষাৎকাৰক ওপৰত ভিত্তি কৰিয়েই এই সমীক্ষা প্ৰকাশ কৰা হৈছে।

Related Topics:আমেৰিকা নৰেন্দ্ৰ মোডী

Up Next

ভয়াৱহ বানৰ কৱলত তামিলনাডুৰ কেইবাখনো জিলা

Don't Miss

লণ্ডনত থাকিব মুকেশ অম্বানি : ৫৯২ কোটি টকীয়া সুদৃশ্য অট্টালিকা

Click to comment

ভাৰত

ভাৰতীয় নৌসেনাৰ মুৰব্বীৰ দায়িত্বত এডমিৰেল আৰ হৰি কুমাৰ

গুৱাহাটী,১ ডিচেম্বৰঃ দেশৰ নৌসেনা বাহিনীৰ ২৫ সংখ্যক মুৰব্বী হিচাপে দায়িত্ব গ্রহণ কৰে এডমিৰেল আৰ হৰি কুমাৰে৷ নৌসেনাৰ মুৰব্বী এডমিৰেল কৰমবীৰ সিঙে অৱসৰ গ্রহণ কৰাৰ পাছতেই ২৫ সংখ্যক চীফ অৱ দ্য নেভেল ষ্টাফ (চিএনএছ) হিচাপে এডমিৰেল আৰ হৰি কুমাৰক দায়িত্ব অর্পণ কৰা হয়।

৪১ বছৰ ধৰি সেৱা আগবঢ়োৱা নৌসেনাৰ মুৰব্বী এডমিৰেল কৰমবীৰ সিঙক স্থলাভিষিক্ত কৰি দেশৰ নৌসেনাৰ নতুন মুৰব্বী ৰূপে দায়িত্ব গ্রহণ কৰা এডমিৰেল কুমাৰে ৱেষ্টার্ন নেভেল কমাণ্ডৰ ফ্লেগ অফিচাৰ কমাণ্ডিং ইন চীফ হিচাপে কার্যনির্বাহ কৰি আছিল৷ ১৯৬২ চনৰ ১২ এপ্রিলত জন্মগ্রহণ কৰা এডমিৰেল কুমাৰ ভাৰতীয় নৌসেনাৰ কার্যবাহী শাখাত ১৯৮৩ চনৰ ১ জানুৱাৰীত নিযুক্তি লাভ কৰিছিল৷ প্রায় ৩৯ বছৰ ধৰি নৌসেনা বাহিনীৰ বিভিন্ন পদবীত কার্যনির্বাহ কৰাৰ অভিজ্ঞতাৰে পুষ্ট এডমিৰেল কুমাৰে আইএনএছ নিশাংক, ক্ষেপণাস্ত্র সন্নিৱিষ্ট আইএনএছ কোৰা আৰু মিছাইল বিধ্বংসী আইএনএছ ৰণবীৰৰ দায়িত্বও চম্ভালিছিল৷

ৱেষ্টার্ন ফ্লীটৰ ফ্লীট অপাৰেচন অফিচাৰ হিচাপে সেৱা আগবঢ়োৱা এডমিৰেল কুমাৰে নৌসেনাৰ বিমান পৰিবাহী আইএনএছ বীৰাটৰো কমাণ্ডাৰ আছিল৷ আমেৰিকা যুক্তৰাষ্ট্রত নেভেল ৱাৰ কলেজত পাঠ্যক্রম সমাপ্ত কৰাৰ লগতে গ্রেট ব্রিটেইনৰ ৰয়েল কলেজ অৱ ষ্টাডিজতো অধ্যয়ন কৰিছিল এডমিৰেল কুমাৰে৷ নৌসেনাত সেৱা আগবঢ়োৱাৰ বাবে এডমিৰেল কুমাৰক পৰম বিশিষ্ট সেৱা মেডেল, অতি বিশিষ্ট সেৱা মেডেল আৰু বিশিষ্ট সেৱা মেডেলেৰে সন্মানিত কৰা হৈছে৷ আজি ছাউথ ব্লক লনত গার্ড অৱ অনাৰ গ্রহণ কৰাৰ পাছত নতুন মুৰব্বী এডমিৰেল কুমাৰে কয়– চীফ অৱ নেভেল ষ্টাফ হিচাপে দায়িত্ব গ্রহণ কৰাটো মহৎ সন্মান৷ ভাৰতীয় নৌবাহিনীয়ে আমাৰ ৰাষ্ট্রীয় সাগৰীয় সুৰক্ষা আৰু প্রত্যাহ্বানৰ ওপৰত প্রাধান্য দি আহিছে৷

ভাৰত

কংগ্ৰেছ আৰু তৃণমূল কংগ্ৰেছৰ মাজত মতান্তৰ

গুৱাহাটী,২৮ নবেম্বৰঃ সংসদৰ শীতকালীন অধিৱেশন প্ৰাৰ্কক্ষণত বিৰোধী ঐক্যত ফাট মেলা পৰিলক্ষিত হৈছে। দৰাচলতে শীতকালীন অধিৱেশনত ঐক্যৱদ্ধভাৱে থিয় দিয়াৰ বাবে কংগ্ৰেছে আহ্বান জনোৱা বিৰোধীৰ বৈঠকত অংশগ্ৰহণ নকৰে মমতা বেনাৰ্জী নেতৃত্বাধীন তৃণমূল কংগ্ৰেছে।

সোমবাৰে বিৰোধী দলসমূহৰ বৈঠকৰ আহ্বান জনাইছিল বিৰোধী দলপতি মল্লিকাৰ্জুন খাৰ্গেই। তৃণমূল কংগ্ৰেছৰ বৰ্জনৰ পিছত দুটা বিৰোধী দল সমাজবাদী পাৰ্টি আৰু আম আদমি পাৰ্টিয়ে এই বৈঠকৰ পৰা আঁতৰি থকাৰ সম্ভাৱনা বৃদ্ধি পাইছে। জানিব পৰা মতে তৃণমূল কংগ্ৰেছৰ গোৱা শাখাৰ বিৰোধিতাৰ বাবই কংগ্ৰেছে আহ্বান কৰা এই বৈঠকৰ পৰ আঁতৰি থকাৰ সিদ্ধান্ত গ্ৰহণ কৰিছে তৃণমূল কংগ্ৰেছৰ সৰ্বভাৰতীয় নেতৃত্বই। উল্লেখ্য যে গোৱাত কংগ্ৰেছ আৰু বিজেপিৰ বিৰুদ্ধ নিৰ্বাচনত অৱৰ্তীণ হৈছিল তৃণমূল কংগ্ৰেছ।

ভাৰত

ভাৰতলৈ আহিব ৰাছিয়াৰ ৰাষ্ট্ৰপতি ভ্লাদিমিৰ পুটিন

গুৱাহাটী,২৭ নবেম্বৰঃ ভাৰতলৈ আহিব ৰাছিয়াৰ ৰাষ্ট্ৰপতি ভ্লাদিমিৰ পুটিন। ভাৰতত অনুষ্ঠিত হ’বলগীয়া ২১ সংখ্যক ভাৰত-ৰাছিয়া সন্মিলনৰ বাবে ভাৰতলৈ আহিব পুটিন। ৬ ডিচেম্বৰত ভাৰতত উপস্থিত হ’ব পুটিন। এই সময়ছোৱাত ৰাছিয়াৰ ৰাষ্ট্ৰপতি পুটিন আৰু ভাৰতৰ প্ৰধানমন্ত্ৰী নৰেন্দ্ৰ মোডীয়ে বৈঠকত অংশগ্ৰহণ কৰিব। কৰ’না কালত এইখন দুয়োজন নেতাৰ প্ৰথম বৈঠক হ’ব। এই সন্মিলনত কৌশলগত অংশীদাৰীত্ব শক্তিশালী কৰাৰ ওপৰত গুৰুত্ব আৰোপ কৰা হ’ব। বৈদেশিক পৰিক্ৰমা মন্ত্ৰালয়ৰ মুখপাত্ৰ অৰিন্দম বাগচীয়ে এই কথা জনায়।

প্ৰধানমন্ত্ৰী নৰেন্দ্ৰ মোডী আৰু ৰাষ্ট্ৰপতি ভ্লাদিমিৰ পুটিনৰ এখন শীৰ্ষ বৈঠকৰ সৈতে ভাৰত-ৰাছিয়া ‘টু-প্লাছ-টু’ বৈঠকৰ প্ৰথম সংস্কৰণ প্ৰতিৰক্ষা আৰু বৈদেশিক মন্ত্ৰীৰ আলোচনা অনুষ্ঠিত হ’ব। ৰাছিয়াৰ ৰাষ্ট্ৰপতিৰ ভাৰত ভ্ৰমণৰ ক্ষেত্ৰত কেইবাটাও চুক্তি স্বাক্ষৰিত হ’ব পাৰে। ২০২১ চনত ভ্লাদিমিৰ পুটিনৰ এইটো দ্বিতীয় বিদেশ ভ্ৰমণ হ’ব। পুটিনে শেষবাৰৰ বাবে ২০১৮ চনত সন্মিলনত অংশগ্ৰহণ কৰিবলৈ আহিছিল। দুয়োখন দেশে এছ-৪০০ চুক্তিস্বাক্ষৰ কৰিছিল।

প্ৰধানমন্ত্ৰী নৰেন্দ্ৰ মোদীয়ে ২০১৯ চনত পূৱ ৰাছিয়াৰ ভ্লাদিভষ্টক চহৰ ভ্ৰমণ কৰিছিল। ভাৰতে সেই সময়ত পূৱ ৰাছিয়াৰ বিকাশত ভাৰতীয় ব্যৱসায়িক অংশগ্ৰহণ বৃদ্ধি কৰিবলৈ ১ বিলিয়ন ডলাৰৰ ছফ্ট ক্ৰেডিট লাইন ঘোষণা কৰিছিল। ইফালে সন্মিলনখনত এছ-৪০০ সন্দৰ্ভত বিতংভাৱে আলোচনা কৰা হ’ব বুলি আশা কৰা হৈছে। ইয়াৰ উপৰিও ভাৰতত ৰাছিয়ান স্পুটনিক লাইট ভেকছিন ব্যাপকভাৱে প্ৰস্তুত কৰা হৈছে। সেই অনুসৰি কৰ’না ভাইৰাছৰ বিষয়েও বৈঠকত আলোচনাৰ সম্ভাৱনাও আছে।