ভাৰত

অৱশেষত বাতিল হ’ল বিতৰ্কিত তিনিখন কৃষি আইন

গুৱাহাটী,১৯ নবেম্বৰঃ অৱশেষত কৃষকৰ আন্দোলনৰ ওচৰত হাৰ মানিলে চৰকাৰে। শুকুৰবাৰে পুৱা ৯ বজাত দেশবাসীক সম্বোধন কৰি প্ৰধানমন্ত্ৰী নৰেন্দ্ৰ মোডীয়ে বিতৰ্কিত ৩ কৃষি আইন বাতিল কৰাৰ কথা ঘোষণা কৰিলে। এই তিনি কৃষি আইনক কেন্দ্ৰ কৰি বিগত প্ৰায় এবছৰ ধৰি দেশব্যাপি কৃষকে কৰি আহিছিল প্ৰতিবাদ। উত্তৰ প্ৰদেশ, মহাৰাষ্ট্ৰ, পঞ্জাৱ, হাৰিয়ানা, মহাৰাষ্ট্ৰকে ধৰি বিভিন্ন ৰাজ্যত অনুষ্ঠিত কৰি আহিছিল মহাপঞ্চায়ত। শুকুৰবাৰে পুৱা দেশবাসীক সম্বোধন কৰি প্ৰধানমন্ত্ৰীয়ে কয়-‘ আজি মই আপোনালোকক, সমগ্ৰ দেশক ক’বলৈ আহিছো যে আমি তিনিওখন কৃষি আইন প্ৰত্যাহাৰ কৰাৰ সিদ্ধান্ত লৈছো। এই মাহৰ শেষৰ ফালে আৰম্ভ হ’বলগীয়া সংসদৰ অধিৱেশনত আমি এই তিনি কৃষি আইন বাতিল কৰাৰ সাংবিধানিক প্ৰক্ৰিয়া সম্পূৰ্ণ কৰিম।’

আমাৰ চৰকাৰে কৃষকসকলৰ কল্যাণৰ বাবে, বিশেষকৈ ক্ষুদ্ৰ কৃষকসকলৰ কল্যাণৰ বাবে, দেশৰ কৃষি জগতৰ স্বাৰ্থত, দেশৰ স্বাৰ্থত, গাওঁৰ দৰিদ্ৰ লোকসকলৰ উজ্জ্বল ভৱিষ্যতৰ বাবে, সকলো আন্তৰিকতাৰে, কৃষকসকলৰ প্ৰতি সমৰ্পণৰ সৈতে, সৎ উদ্দেশ্যৰে এই আইন খন আনিছিলো।

ইয়াৰ উপৰিও তিনি বিতৰ্কিত কৃষি আইনৰ কথা উল্লেখ কৰি প্ৰধানমন্ত্ৰীয়ে কয়-‘ আমাৰ প্ৰচেষ্টা স্বত্বেও আমি কিছুমান কৃষকক বুজাব পৰা নাছিলো। কৃষি অৰ্থনীতিবিদ, বিজ্ঞানী, প্ৰগতিশীল কৃষকসকলেও তেওঁলোকক কৃষি আইনৰ গুৰুত্ব বুজাবলৈ যথাসাধ্য চেষ্টা কৰিছিল। কৃষকসকলৰ অৱস্থা উন্নত কৰাৰ বাবে এই বৃহৎ অভিযানত দেশত তিনি কৃষি আইন প্ৰৱৰ্তন কৰা হৈছিল।’ তেওঁ কয়-‘ দেশৰ কৃষকসকলক, বিশেষকৈ ক্ষুদ্ৰ কৃষকসকলক তেওঁলোকৰ উৎপাদিত সামগ্ৰীৰ সঠিক মূল্য আৰু উৎপাদিত সামগ্ৰী বিক্ৰী কৰাৰ সৰ্বাধিক বিকল্প প্ৰাপ্ত কৰাৰ লক্ষ্য আছিল। বছৰ বছৰ ধৰি, এই দাবীবোৰ দেশৰ কৃষক, দেশৰ কৃষি বিশেষজ্ঞ, দেশৰ কৃষক সংগঠনবোৰে নিৰন্তৰ ভাৱে কৰি আহিছিল। বহু চৰকাৰে ইয়াৰ ওপৰত আগতে চিন্তা-চৰ্চা কৰিছিল। এইবাৰো, সংসদৰ অধিৱেশনত আলোচনা, চিন্তা-চৰ্চাৰে এই আইনসমূহ অনা হৈছিল।’ প্ৰধানমন্ত্ৰী মোডীয়ে কয়-‘ আজি নিজেই চৰকাৰে কৃষি খণ্ডসম্পৰ্কীয় আন এটা গুৰুত্বপূৰ্ণ সিদ্ধান্ত লৈছে। শূণ্য বাজেট কৃষি, অৰ্থাৎ প্ৰাকৃতিক কৃষিৰ প্ৰচাৰৰ বাবে, দেশৰ পৰিৱৰ্তনশীল প্ৰয়োজনীয়তাৰ প্ৰতি লক্ষ্য ৰাখি, এম এছ পি অধিক কাৰ্যকৰী আৰু স্বচ্ছ কৰাৰ বাবে, ভৱিষ্যতৰ প্ৰতি লক্ষ্য ৰাখি এনে সকলো বিষয়ৰ ওপৰত সিদ্ধান্ত লোৱাৰ বাবে বৈজ্ঞানিকভাৱে শস্যৰ আৰ্হি সলনি কৰাৰ বাবে এখন সমিতি গঠন কৰা হ’ব।’

Related Topics:কৃষি আইন নৰেন্দ্ৰ মোডী

Up Next

অন্ধ্ৰপ্ৰদেশত বানৰ তাণ্ডৱ : ১৭ জন লোকৰ মৃত্যু

Don't Miss

কেন্দ্ৰৰ নতুন অধ্যাদেশৰ বিৰুদ্ধে ন্যায়ালয়ৰ দ্বাৰস্থ সাংসদ মহুৱা মৈত্ৰ

Click to comment

ভাৰত

ভাৰতীয় নৌসেনাৰ মুৰব্বীৰ দায়িত্বত এডমিৰেল আৰ হৰি কুমাৰ

গুৱাহাটী,১ ডিচেম্বৰঃ দেশৰ নৌসেনা বাহিনীৰ ২৫ সংখ্যক মুৰব্বী হিচাপে দায়িত্ব গ্রহণ কৰে এডমিৰেল আৰ হৰি কুমাৰে৷ নৌসেনাৰ মুৰব্বী এডমিৰেল কৰমবীৰ সিঙে অৱসৰ গ্রহণ কৰাৰ পাছতেই ২৫ সংখ্যক চীফ অৱ দ্য নেভেল ষ্টাফ (চিএনএছ) হিচাপে এডমিৰেল আৰ হৰি কুমাৰক দায়িত্ব অর্পণ কৰা হয়।

৪১ বছৰ ধৰি সেৱা আগবঢ়োৱা নৌসেনাৰ মুৰব্বী এডমিৰেল কৰমবীৰ সিঙক স্থলাভিষিক্ত কৰি দেশৰ নৌসেনাৰ নতুন মুৰব্বী ৰূপে দায়িত্ব গ্রহণ কৰা এডমিৰেল কুমাৰে ৱেষ্টার্ন নেভেল কমাণ্ডৰ ফ্লেগ অফিচাৰ কমাণ্ডিং ইন চীফ হিচাপে কার্যনির্বাহ কৰি আছিল৷ ১৯৬২ চনৰ ১২ এপ্রিলত জন্মগ্রহণ কৰা এডমিৰেল কুমাৰ ভাৰতীয় নৌসেনাৰ কার্যবাহী শাখাত ১৯৮৩ চনৰ ১ জানুৱাৰীত নিযুক্তি লাভ কৰিছিল৷ প্রায় ৩৯ বছৰ ধৰি নৌসেনা বাহিনীৰ বিভিন্ন পদবীত কার্যনির্বাহ কৰাৰ অভিজ্ঞতাৰে পুষ্ট এডমিৰেল কুমাৰে আইএনএছ নিশাংক, ক্ষেপণাস্ত্র সন্নিৱিষ্ট আইএনএছ কোৰা আৰু মিছাইল বিধ্বংসী আইএনএছ ৰণবীৰৰ দায়িত্বও চম্ভালিছিল৷

ৱেষ্টার্ন ফ্লীটৰ ফ্লীট অপাৰেচন অফিচাৰ হিচাপে সেৱা আগবঢ়োৱা এডমিৰেল কুমাৰে নৌসেনাৰ বিমান পৰিবাহী আইএনএছ বীৰাটৰো কমাণ্ডাৰ আছিল৷ আমেৰিকা যুক্তৰাষ্ট্রত নেভেল ৱাৰ কলেজত পাঠ্যক্রম সমাপ্ত কৰাৰ লগতে গ্রেট ব্রিটেইনৰ ৰয়েল কলেজ অৱ ষ্টাডিজতো অধ্যয়ন কৰিছিল এডমিৰেল কুমাৰে৷ নৌসেনাত সেৱা আগবঢ়োৱাৰ বাবে এডমিৰেল কুমাৰক পৰম বিশিষ্ট সেৱা মেডেল, অতি বিশিষ্ট সেৱা মেডেল আৰু বিশিষ্ট সেৱা মেডেলেৰে সন্মানিত কৰা হৈছে৷ আজি ছাউথ ব্লক লনত গার্ড অৱ অনাৰ গ্রহণ কৰাৰ পাছত নতুন মুৰব্বী এডমিৰেল কুমাৰে কয়– চীফ অৱ নেভেল ষ্টাফ হিচাপে দায়িত্ব গ্রহণ কৰাটো মহৎ সন্মান৷ ভাৰতীয় নৌবাহিনীয়ে আমাৰ ৰাষ্ট্রীয় সাগৰীয় সুৰক্ষা আৰু প্রত্যাহ্বানৰ ওপৰত প্রাধান্য দি আহিছে৷

ভাৰত

কংগ্ৰেছ আৰু তৃণমূল কংগ্ৰেছৰ মাজত মতান্তৰ

গুৱাহাটী,২৮ নবেম্বৰঃ সংসদৰ শীতকালীন অধিৱেশন প্ৰাৰ্কক্ষণত বিৰোধী ঐক্যত ফাট মেলা পৰিলক্ষিত হৈছে। দৰাচলতে শীতকালীন অধিৱেশনত ঐক্যৱদ্ধভাৱে থিয় দিয়াৰ বাবে কংগ্ৰেছে আহ্বান জনোৱা বিৰোধীৰ বৈঠকত অংশগ্ৰহণ নকৰে মমতা বেনাৰ্জী নেতৃত্বাধীন তৃণমূল কংগ্ৰেছে।

সোমবাৰে বিৰোধী দলসমূহৰ বৈঠকৰ আহ্বান জনাইছিল বিৰোধী দলপতি মল্লিকাৰ্জুন খাৰ্গেই। তৃণমূল কংগ্ৰেছৰ বৰ্জনৰ পিছত দুটা বিৰোধী দল সমাজবাদী পাৰ্টি আৰু আম আদমি পাৰ্টিয়ে এই বৈঠকৰ পৰা আঁতৰি থকাৰ সম্ভাৱনা বৃদ্ধি পাইছে। জানিব পৰা মতে তৃণমূল কংগ্ৰেছৰ গোৱা শাখাৰ বিৰোধিতাৰ বাবই কংগ্ৰেছে আহ্বান কৰা এই বৈঠকৰ পৰ আঁতৰি থকাৰ সিদ্ধান্ত গ্ৰহণ কৰিছে তৃণমূল কংগ্ৰেছৰ সৰ্বভাৰতীয় নেতৃত্বই। উল্লেখ্য যে গোৱাত কংগ্ৰেছ আৰু বিজেপিৰ বিৰুদ্ধ নিৰ্বাচনত অৱৰ্তীণ হৈছিল তৃণমূল কংগ্ৰেছ।

ভাৰত

ভাৰতলৈ আহিব ৰাছিয়াৰ ৰাষ্ট্ৰপতি ভ্লাদিমিৰ পুটিন

গুৱাহাটী,২৭ নবেম্বৰঃ ভাৰতলৈ আহিব ৰাছিয়াৰ ৰাষ্ট্ৰপতি ভ্লাদিমিৰ পুটিন। ভাৰতত অনুষ্ঠিত হ’বলগীয়া ২১ সংখ্যক ভাৰত-ৰাছিয়া সন্মিলনৰ বাবে ভাৰতলৈ আহিব পুটিন। ৬ ডিচেম্বৰত ভাৰতত উপস্থিত হ’ব পুটিন। এই সময়ছোৱাত ৰাছিয়াৰ ৰাষ্ট্ৰপতি পুটিন আৰু ভাৰতৰ প্ৰধানমন্ত্ৰী নৰেন্দ্ৰ মোডীয়ে বৈঠকত অংশগ্ৰহণ কৰিব। কৰ’না কালত এইখন দুয়োজন নেতাৰ প্ৰথম বৈঠক হ’ব। এই সন্মিলনত কৌশলগত অংশীদাৰীত্ব শক্তিশালী কৰাৰ ওপৰত গুৰুত্ব আৰোপ কৰা হ’ব। বৈদেশিক পৰিক্ৰমা মন্ত্ৰালয়ৰ মুখপাত্ৰ অৰিন্দম বাগচীয়ে এই কথা জনায়।

প্ৰধানমন্ত্ৰী নৰেন্দ্ৰ মোডী আৰু ৰাষ্ট্ৰপতি ভ্লাদিমিৰ পুটিনৰ এখন শীৰ্ষ বৈঠকৰ সৈতে ভাৰত-ৰাছিয়া ‘টু-প্লাছ-টু’ বৈঠকৰ প্ৰথম সংস্কৰণ প্ৰতিৰক্ষা আৰু বৈদেশিক মন্ত্ৰীৰ আলোচনা অনুষ্ঠিত হ’ব। ৰাছিয়াৰ ৰাষ্ট্ৰপতিৰ ভাৰত ভ্ৰমণৰ ক্ষেত্ৰত কেইবাটাও চুক্তি স্বাক্ষৰিত হ’ব পাৰে। ২০২১ চনত ভ্লাদিমিৰ পুটিনৰ এইটো দ্বিতীয় বিদেশ ভ্ৰমণ হ’ব। পুটিনে শেষবাৰৰ বাবে ২০১৮ চনত সন্মিলনত অংশগ্ৰহণ কৰিবলৈ আহিছিল। দুয়োখন দেশে এছ-৪০০ চুক্তিস্বাক্ষৰ কৰিছিল।

প্ৰধানমন্ত্ৰী নৰেন্দ্ৰ মোদীয়ে ২০১৯ চনত পূৱ ৰাছিয়াৰ ভ্লাদিভষ্টক চহৰ ভ্ৰমণ কৰিছিল। ভাৰতে সেই সময়ত পূৱ ৰাছিয়াৰ বিকাশত ভাৰতীয় ব্যৱসায়িক অংশগ্ৰহণ বৃদ্ধি কৰিবলৈ ১ বিলিয়ন ডলাৰৰ ছফ্ট ক্ৰেডিট লাইন ঘোষণা কৰিছিল। ইফালে সন্মিলনখনত এছ-৪০০ সন্দৰ্ভত বিতংভাৱে আলোচনা কৰা হ’ব বুলি আশা কৰা হৈছে। ইয়াৰ উপৰিও ভাৰতত ৰাছিয়ান স্পুটনিক লাইট ভেকছিন ব্যাপকভাৱে প্ৰস্তুত কৰা হৈছে। সেই অনুসৰি কৰ’না ভাইৰাছৰ বিষয়েও বৈঠকত আলোচনাৰ সম্ভাৱনাও আছে।